ភ្នំពេញ៖ អាជ្ញាធរបានបញ្ជូនបុរសជនជាតិចិនម្នាក់ទៅអធិការដ្ឋាននគរបាលខណ្ឌច្បារអំពៅ ក្រោយពីបានបើករថយន្តបុករះកន្លែងលក់បន្លែនៅតាមចិញ្ចើមថ្នល់ស្ថិតក្នុងសង្កាត់ច្បារអំពៅទី២ ខណ្ឌច្បារអំពៅ កាលពីម៉ោង៤ទាបភ្លឺ ចូលថ្ងៃទី១៧ ខែតុលា ឆ្នាំ២០២២ បណ្តាលឱ្យពលរដ្ឋប្រមាណ ១០នាក់រងរបួសធ្ងន់ និងស្រាល។

លោក បេង ដាណារ៉ា ស្នងការរងទទួលដឹកនាំអធិការខណ្ឌច្បារអំពៅ បានថ្លែងប្រាប់អ្នកសារព័ត៌មាន EAC ថា ក្រោយពីមានហេតុការណ៍បុករះលើពលរដ្ឋដែលជាម្ចាស់អាជីវករលក់បន្លែនៅខណ្ឌច្បារអំពៅភ្លាមៗ អាជ្ញាធរបានបញ្ចូនទៅការិយាល័យនគរបាលចរាចរណ៍ផ្លូវគោក ដើម្បីសួរនាំ និងអនុវត្តតាមផ្លូវច្បាប់។

គូសបញ្ជាក់កាលពីយប់ទាបភ្លឺ មានបុរសជនជាតិចិនម្នាក់បានបើករថយន្តទាំងស្រវឹងបុករះ និងអូសម៉ូតូ រ៉ឺម៉ក កង់បីឥណ្ឌាជាច្រើនគ្រឿង បណ្តាលឱ្យពលរដ្ឋជាច្រើននាក់រងរបួសធ្ងន់ និងស្រាល និងខូចខាតបន្លែរបស់អាជីវករ។ ភ្លាមៗពលរដ្ឋដែលរងរបួសត្រូវបានពលរដ្ឋផ្សេងៗបញ្ជូនទៅសង្រ្គោះ និងព្យាបាលនៅមន្ទីរពេទ្យ៕